Ngā Kōrero o Te Manurewa o Tamapahore
Nau mai, piki mai, kake mai ki ngā kōrero tuku iho a Te Manurewa o Tamapahore. Ka whakakīngia koe i tō kete mātauranga ki ngā kōrero, me ngā tikanga o nehe, o Ngāti Te Ata.
Ko te kaupapa o tēnei pae tukutuku, ko te aro atu ki te hītori o Manurewa me te whakapapa o te ingoa o tēnei rohe. I kōrerorerohia tēnei i ngā akomanga o ngā kura o Manurewa i runga i te tautoko mai o te mana whenua. I hono ā-tinana ngā ākonga o ngā kura ki te hītori me ngā kōrero tuku iho o Te Manurewa o Tamapahore nā tā rātou tae atu ki ngā maunga tapū, arā, ko Mātukutūreia rāua ko Mātukutūrūrū.
I runga i ēnei maunga tapū i whakatōngia ai te hautūnga, te manawaroa me te manawanui ki roto i te ākonga, i runga i te tikanga ā-ahurea, i runga anō hoki i ngā kōrero o Te Manurewa o Tamapahore hei aratohu. Nō konei, kua whakamanahia te ākonga kia tūhono atu ki tōna reo, tōna ahurea kia whakataha hē me te piki atu ki te rangi.
Ko Te Aho Ngārahu tētehi kaupapa i whakatūngia e Te Tāhuhu o Te Mātauranga. Ko te whāinga kia māmā ake ai te whai i ngā rauemi reo Māori nō te rohe nei kia tautoko i ngā ākonga, ngā pouako me ngā kaimahi e ako ana i roto i te reo Māori, i ngā wāhi rūmaki reo, i ngā karaehe reorua auraki, i ngā kaerehe rūmaki auraki anō hoki o ngā kura.
Ko te ingoa tuturu o Manurewa, ko Te Manurewa o Tamapahore. E rua ngā tama a Huarangi, he tupuna nō te takiwā. Ko Tamapahure ki tana wahine tuatahi, ko Tamapahore ki tana wahine tuarua. Nāwai rā ka rarua ōna whānau e rua, ā, ka wehe rātou.
Huri noa te wā, kua rangatira ngā tama nei. Ko Tamapahure te rangatira o Mātukutūreia, ā, ko Tamapahore te rangatira o Mātukutūrūrū. He rā anō, e whakarere ana rāua i ō rāua manu tukutuku. Teitei ake te rere o tā Tamapahore, te teina. Ka riri a Tamapahure, ā, ka tukua te taura o te manu o te teina kia rewa ki te rāwhiti. Rere atu ai i te hau te manu tukutuku a Tamapahore, ā, hei whakamaharatanga ki a ia, ka tapaia te takiwā ko Te Manurewa o Tamapahore.
He rauemi tēnei e whakanui, e toha atu i ngā mea pai o tēnei hapori whakahirahira o Te Manurewa o Tamapahore. Ko tā mātou ko te whakaatu atu i ngā momo āhuatanga mīharo o Te Manurewa o Tamapahore.
E noho whakaiti ana mātou i runga i te hokinga mahara ki a Dame Kahurangi Ngāneko Kaihau Minhinnick me tāna pukumahi ki te pupuru tonu i ngā taonga tuku iho a rātou mā mō Ngāti Te Ata me ngā iwi whānui. Ngā mihi nunui anō hoki ki a Roimata Minhinnick rāua ko Kapi Petia me tā rātou whakamana i te kaupapa nei. Ka tuku mihi atu ki te Kura o Clendon Park mō tā rātou tautoko me te hautū i tēnei kaupapa kia puāwai ngā whakaaro nō roto o te kura, te hapori o Te Manurewa o Tamapahore me Aotearoa whānui anō hoki.
Ko tā mātou e hihiri ana kia hanga ai i tētehi rauemi ako mō ngā ākonga me ngā pouako. Kia māmā te ako, kia pārekareka anō hoki mō te hinengaro. Anei rā, te kai o te rangatira.
He whakatinanatanga ā-ataata te pikitia pakitara mō ngā kōrero tuku iho o Ngāti Te Ata. Mā ngā kaupapa here e whakamanahia ai te tangata, arā, ko te whakapapa, ko te manawaroa me te piki atu ki te rangi.
Ko te mahi-toi nei he tohu whakamana i te hapori whānui o Te Manurewa o Tamapahore me te tirohanga Māori e whiri tahi ai ngā peka katoa o te hapori nei. Toru katoa ngā wahanga o tēnei tohu.
